ناقصينك احنا... يا بوعمر

كتب بو عمر مقالة عرمرمية استخباراتية من يقراها يعتقد انه يقرأ رسالة مشفْرة لكثرة الرموز والإيحاءات والنغزات واللمزات والهمزات والكسرات والشلخات ...
فوق همومنا ومشاكلنا طلع لنا الطيب بمقالة نستنا مشاكلنا اليومية ومجارينا الطافحة وبحرنا المصيّن وجونا الملوث ... وطبعا لأن الشعب الكويتي لازم يعيش منغث ليل نهار فلازم نتحمل الحبيب ومقالاته إلي ما فيها شي غير الفتنة على شوية حقد ومرشوش عليها شوية كلك....
مقالات بو عمر تنفع مسلسلات مصرية على أجزاء كل جزء من اربع وسبعين حلقة .... يا بوعمر خلّصنا عاد.... الناس قالت رايها فيك بالصناديق ورسالة الكويتيين وصلت لك وقالوا لك يبا نختار (الجويهل) ولا نختارك...
من منو قاعد تنتقم ليش هالمقالات إلي ما تزيدنا إلا قهر يبا اذا عندك معلومات وكلامك الي قلته بمقالتك الأخيرة صج روح وقدم بلاغ وارفع قضية ومارس دورك يا محامي لان كلامك يبا تراه حده خطير ... ليش ساكت كل هالمدة عن سالفة مثل هذي لليلحين....
وين طلعت لنا بسالفتك هذي والله محد استفاد من تقريرك المخابراتي المكتوب بالحبر السري .....إلا وزير الأشغال الي نست الناس سالفة محطته الي غرّقت الديرة بمجاريها بعد ما طقت مضخاتها ....
يا بوعمر كافينا قهر مو ناقصين مغثتك الي فينا كافينا روح صف حساباتك بعيد عن هالشعب الي طاقه جبده من وضع الديرة... بس الشرهة مو عليك على الي يقرا لك... وتدري اشلون زين يسوي فيك بو شيخة....
وتقولون ليش منقهر....